Rock n' Cinnamon Roll!

        Naaalala ko pa noong bata ako at namamasyal kami ng pamilya ko sa mall. Sa tuwing nadadaan kami sa Cinnabon, sinasalubong kami ng amoy ng kanela o cinnamon sa Ingles. Bagamat hindi pa ko nakakatikim ng cinnamon roll nang mga panahon na iyon, alam ko na masarap ang lasa noon dahil sa masarap na amoy at katakamtakam na itsura nito.

        Ang cinnamon roll ay isang matamis na pastry na tinatawag ding cinnamon swirl at cinnamon snail. Sa pagkakaalam ko, nilalagyan ng cinnamon and sugar mixture at iba pang sangkap gaya ng pasas at chocolate ang isang dough na may butter. Pagkatapos ay niroroll ito, hinahati at binebake. Pagkakuha sa oven ay nilalagyan ito ng icing sa taas. Madali lamang itong gawin pero masarap ang lasa nito. Bukod dito, marami din itong magandang maidudulot sa ating kalusugan. Ang cinnamon ay mayroong fiber, iron at calcium. Nakakababa din ito ng cholesterol at pinipigilan nito ang pagdami ng cancer cells. Ayon din sa research ko, ang amoy ng cinnamon daw ay nakakapagpatalas ng memorya. Ang dami pala nitong benepisyo sa ating kalusugan!

         Naaalala ko tuloy nang una akong nakakain ng cinnamon roll. Isang random na umaga sa buhay ko, umalis ang lola ko at nag-iwan siya ng almusal sa lamesa. Tiningnan ko kung ano iyon. Aba! Cinnamon roll! Nung una ay hindi ko ito masyadong nagustuhan ngunit dahil nagugutom ako ay kinain ko na rin ito. Mabuti na lamang at gutom ako dahil napagtanto ko na masarap pala ito. Malambot at mainit-init pa ang tinapay ngunit ang lasa nito ay kakaiba sa mga tinapay na natikman ko at talagang nangingibabaw ang amoy at lasa ng cinnamon. Maraming may ayaw ng amoy ng kanela dahil daw sa tapang ng amoy nito ngunit gustong-guto ko naman iyon at hindi ko alam kung bakit. Marahil nagustuhan ko ito dahil sa pagkahilig ko sa matatamis. Tinanong ko ang lola ko kung saan niya iyon binili at nalaman ko na nabili niya ito sa bakery malapit saamin sa halagang sampung piso isang piraso. Nagulat ako dahil ang akala ko puro ensaymada lang ang tinitinda nila doon. 
  
        Simula noon ay lagi na akong nag-aalmusal ng cinnamon roll at hanggang ngayon ay hindi pa rin ako nagsasawa. Sumasaya ako pag kumakain ako noon. Sa tuwing kakain ako ng cinnamon roll, naaalala ko ang mga umaga na nanonood kami ng kapatid ko ng Doraemon sa bahay at kumakain nito. Nagyong nagdodorm na ako, bihira na akong nakakapag-almusal at hindi ko din alam kung saang lupalop ako makakabili ng cinnamon roll. Isang gabi, habang kami ng mga roommate ko ay kumakain sa Goldilocks na malapit sa dorm namin, nadiskubre ko na meron pala silang tindang cinnamon roll! Mabuti na lang!

by: Katrina S. Estomaguio