"Tikman mo ang sarap ng Chopsuey ni inay..."

Sa dinami-rami ng mga pagkaing akin ng natikman, hindi ko na masabi kung alin ang pinakapaborito ko sa mga ito. Kapag ako'y pumipirma sa mga "slumbook", sa parte ng "favorite food" ang palagi kong sinusulat ay gulay. Marahil dahil ito ang hilig kong kainin. Ngunit maraming luto ang pwedeng gawin sa gulay pero ang pinakagusto ko ay ang Chopsuey. Ito ay isang putahe na galing sa mga Intsik. Ang pangunahing sangkap nito ay mga gulay tulad na lamang ng carrots, cauliflower, baby corn, brocoli, sayote, beans, chicharo at kung minsan ay dinadagdagan pa namin ito ng repolyo. May halo din itong manok o di kaya ay baboy at para sa sabaw ay pinalapot na gawgaw sa may tubig. Para naman sa pampalasa ay kakarampot na asin, pamintang durog at toyo upang mabigyan ang onting kulay ang sabaw.

Bata pa lamang ako pinapakain na ko ng mama ko ng gulay ng kahit na anong luto pero ang pinakapaborito ko ay chopsuey. Sa dinami-rami ng gulay na sangkap nito, e siguradong malinamnam at napakasustansya nito. Halimbawa na lamang ay carrots. Kapag kumain ka ng carrots lilinaw ang mga mata mo. Napatunayan ko yan sa aking sarili. Sa aming mag-anak ako lamang ang hindi nagsasalamin. Masasabi ko rin na ako ang may pinakamalakas na resistensiya sa amin. Bihira sa akin ang magkaroon ng lagnat. Madalas ubo at sipon. Kaya naman malaki ang aking pasasalamat ko sa magulang ko na pinalaki akong mahilig sa gulay.

 

Ibang saya ang nararamdaman ko kapag umuwi ako sa bahay galing UST na pagod na pagod sa pag-iisip ng mga sagot sa mga tanong ng aking mga propesor, sa pag-upo ng halos apat na sunud-sunod na oras, pagmamasid sa aking mga katabi kung may kakaiba sa kanilang lahat ang pinaka at sobrang nakakapagod ay ang umupo ka sa jeep at lumanghap ng usok ng tambutso habang sirang-sira na ang eardrums mo sa mga malalakas at tuluy-tuloy na busina ng mga bus, jeep, trak, taxi, kotse at kung anu pa mang uri ng sasakyang makikita mo sa kalsada. Meron nga pedicab kala mo kung bumusina parang isang napakaliaking trak. Gayunpaman, pagdating ko sa bahay, parang isang bula lang ang lahat. Bigla na lang mawawala ang lahat sa isang iglap kapag naamoy ko na ang luto ni mommy na Chopsuey. Mas sumasarap ito kapag mainit lalo na ngayong panahon na taglamig. Masarap higupin ang mainit nitong sabaw lalo na kapag ang kasalo mo sa hapag-kainan ay ang iyong pamilya.

- Klara Isabel T. Villena

              1T2